Мэдээ

Завхан аймгийн Биеийн тамир, спортын газар нь 1947 онд БНМАУ-ын сайд нарын Зөвлөлийн тогтоолоор аймгийн захиргааны дэргэд 1 орон тоотойгоор байгуулагдаж, хожим манай улсад Биеийн тамир Спортын Эвлэл байгуулагдсныг үндэслэн мөн аймгийн захиргааны дэргэд Биеийн тамир, спортын тасаг болон өөрчлөгдөж, улмаар 1960 онд Завхан нийгэмлэг, 1979 онд Биеийн тамир, спортын хороо болон шинэчлэгдэн байгуулагдсан түүхтэй. Харин өнөөдөр Аймгийн Засаг даргын хэрэгжүүлэгч агентлаг, Биеийн тамир спортын газар болон үйл ажиллагаа явуулж байна. Завхан аймгийн Биеийн тамир, спортын газар нь өнгөрч буй түүхэн жилүүдэд эгнээнээсээ Гавьяат тамирчин 15, Гавьяат дасгалжуулагч 10, олон улсын хэмжээний мастер 130, Спортын мастер, дэд мастер 500 гаруй, Олон улсын шүүгч 9, Улсын шүүгч 16, зэрэг, цолтой шүүгч 80 гаруй, төрүүлж улс бүс, тив дэлхийн чанартай тэмцээн уралдаануудад амжилтаа ахиулсаар байна. Завхан аймгаар овголсон МУ-ын аварга С.Шагж, Улсын арслан М.Лхагваа, гарьд Ц.Цэрэнпунцаг, М.Баяржавхлан, Б.Гончигдамба,  Ш.Жаргалсайхан тэргүүтэй улс аймгийн алдар цолтой бөхчүүд,  МУ-ын Дархан мэргэн, зууны манлай харваач Ш.Даваахүү, МУ-ын даян мэргэн Б.Ёндон,  Д.Дэмбэрэлсайхан тэргүүтэй харваачид,  МУ-ын Тод манлай уяач Н.Даш-Өлзий, Л.Цандэлэг, Д.Давагдорж, Б.Содномцог, Б.Энхболд тэргүүтэй уяачдын Монгол үндэсний спортоор  гаргасан бахархам гавьяа, бахдам амжилт нь Завхан аймгийн Биеийн тамир, спортын газартай салшгүй холбоотой юм. Завхан аймгийн иргэдийг эрүүл чийрэг байлгах, тэдний биеийн тамир, спортоор хичээллэх орчин нөхцөлийг бүрдүүлж, их спорт, олимпийн хөдөлгөөнийг сурталчилна дэлгэрүүлэх тамирчдын залгамж холбоог бэлтгэх үйлст  Завхан нутгийн төр захиргаа, аж ахуй нэгж байгууллагууд, спортын холбоодын оруулж буй хувь нэмэр үүрэг ач холбогдол их байдагт талархал илэрхийлье. Манай байгууллага нь 2020 оны УИХ-ын сонгуулийн үр дүнгээр байгуулагдсан ерөнхий бүтцээр, Монгол Улсын Ерөнхий сайдын эрхлэх асуудлын хүрээнд  2020 оны 08 дугаар сарын 12 -ний өдрийн Засгийн газрын  47 дугаар тогтоолоор Засгийн газрын тохируулагч агентлаг Биеийн тамир спортын хорооны бүрэлдэхүүнд шилжин, эрх зүйн акт хуулийн шинэчлэлийн  хүрээнд ажлаа шинэчлэн зохион байгуулан ажиллаж байна. Завхан аймгийн Засаг даргын захирамжаар “Хөдөлгөөн эрүүл мэнд” хөтөлбөрийн хүрээнд нийтийн биеийн тамир, спортын бүх насны иргэдэд хүргэх зорилт тавин хичээл зүтгэл сэтгэл гарган ажиллаж байна.

ЗАВХАН АЙМГИЙН БИЕИЙН ТАМИР,СПОРТЫН ГАЗРЫН

ДАРГА М. БАТБАЯР